बीरेन्द्र पौडेल, मुम्बई
नेपालीभाषी गायक प्रशान्त तामाङ र गायिका प्रकृति गिरीको सफलतापछि पुनः एक नेपाली गायक टेलिभिजनमार्फत संगीतको प्रतिस्पर्धामा उत्रिएका छन्। एनडी टिभी इम्याजिनमा प्रस्तुत हुने रियालिटी शो लक्स “जुनुन” ‘कुछ कर दिखानेका’ मा नेपालीभाषी गायक राजिब थापा (चम्बा) प्रतिस्पर्धा गरिरहेका छन् । प्रत्येक शुक्रबार र शनिबार साढे ८ बजेदेखि प्रस्तुत हुने सो प्रतिस्पर्धात्मक कार्यक्रममा तीनवटा जर्जहरुका ६-६ जना प्रतिस्पर्धी गायक-गायिकाहरु रहेका छन् । विशेषगरी लोक संगीत, सुफि र फिल्मी संगीत गरी तीन विधामा छुट्टाएर प्रतिस्पर्धा गराईएको सो कार्यक्रममा गायिका इला अरुणको ग्रुपमा राजिब थापा (चम्बा) रहेका छन्।
कार्यक्रमका सुफी संगीतको लागि राहत फतेली खान र हिन्दी संगीतको लागि संगीतकार आनन्दराज आनन्दलाई जजको रुपमा राखिएको छ । कर्जतमा सुटिङ भईरहेको यस कार्यक्रमको सञ्चालन अन्नु कपुरले गरिरहेका छन् भने कार्यक्रमको प्रमोशनको लागि चर्चित नायक ऋतिक रोशनले विशेष भूमिका खेलेका छन्। हिमाञ्चल प्रदेशमा जन्मिएका राजिबले कार्यक्रमको एउटा एपिसोडमा हिमाञ्चलको र अर्को एपिसोडमा नेपाली गीत प्रस्तुत गर्ने छन् । गत शनिबारको एपिसोडमा गायक राजिबले हिउंचुलीमा घाम लाग्यो घमाईलो, आफ्नै गाउं आफ्नै ठाउं लाग्छ नि रमाईलो.. भन्ने नेपाली गीत गाएका थिए । गीत गाईसकेपछि उनले सो गीतलाई हिन्दीमा समेत अर्थाएका थिए । यसभन्दा अघि विभिन्न रियालिटी शोहरु सारेगम एक र दुई तथा च्यालेन्ज २००५ मा पनि सहभागी भएर प्रतिस्पर्धामा उत्रिएका राजिबले यो प्रतिस्पर्धामा कति सफलता हात पार्ने हुन त्यो भने हेर्न बाँकी नै छ । अब अर्को एपिसोडपछि भोटिङ सुरु हुने भएकोले सबैलाई भोट गर्न अपिल गर्दै कार्यक्रम हेरेर प्रतिक्रिया दिन समेत राजिबले आग्रह गरेका छन्।